Førdefestivalen -09 og 3MA

Kvart år på denne tida har vi noko som heiter Førdefestivalen i Førde. Tidlegare heitte den Førde Internasjonale Folkemusikkfestival, eit namn som sa litt meir om innhaldet i festivalen. I løpet av intense dagar i starten av juli, denne gongen 2.-5.juli, kan ein få høyre og sjå folkemusikarar og -dansarar frå mange plassar i verda.

I år var eitt av dei kanskje største trekkplastera folkedansgruppa Frikar, kjent frå Eurovisjonen tidlegare i år, der dei dansa til Alexander Rybak sitt nummer.

Eg for min del skulle noko mykje viktigare denne helga (sjå JB att:D), og reiste difor ikkje på noko særleg av det som vart arrangert. Men då eg høyrde at mellom andre 3MA skulle opptre på utescene ved Førde Torg på fredagen, ville eg gjerne få med meg det! Det er nemleg ei gruppe som består av tre musikarar som speler på strengeinstrument og er frå tre land som startar på MA, nemleg Mali, Marokko og Madagaskar:) Og sidan eg skal i utanlandspraksis mest sannsynleg på Madagaskar måtte eg prøve å få med meg dette!

Lenge såg det ut til å spøke for den kulturelle utflukta mi, for det var snakk om at Tryggve, bror til JB, som eg skulle sitte på med, måtte reise torsdag kveld i staden, i og med at han hadde fått tannlegetime fredag. Men han avbestilte den, slik at vi kunne reise fredag ettermiddag som planlagt:) Fredag morgon var det òg ein del å gjere heime.. Konserten skulle starte 10.30, så eg tenkte at det sikkert heldt om eg stod opp rundt 9. Men då eg kom ned, hadde mamma starta med oppvasken, eg brukte lang tid i dusjen og klokka var plutseleg nærare 10 då eg kom opp att.. Og så måtte vi ha frukost og så gjekk tida. Vi var ikkje i Førde før klokka hadde passert 11.. Heldigvis var det ikkje berre 3MA som skulle opptre denne dagen. Der var òg to andre grupper, og det var desse som hadde begynt:D Første gruppa fekk vi ikkje med oss - dei hadde hatt halvtimen fram til 11. Gruppa som heldt på då vi kom var Kenge Kenge, ei perkusjons-, danse- og syngegruppe frå Kenya. Det var flott! Etterpå kom 3MA, som for høvet var 2MA, i og med at sistemann ikkje hadde komme fram enno. Heldigvis var Rajery, han frå Madagaskar, der med valihaen sin, eit slags bambusrør med strengar utanpå. Det vart ein flott liten halvtime med fascinerande afrikansk strengemusikk. Det såg ut som dei kosa seg på scena, og det gjorde vi som stod og høyrde på òg:)

Så no har eg eit nytt ønske på lista mi: albumet Rajery/Ballaké Sissoko/Driss El Maloumi frå gruppa 3MA:D

For høvet 2MA på scena;
her Ballaké Sissoko, ein av dei mest respekterte koraspelarane i Mali til venstre
og valiha-meisteren Rajery frå Madagaskar til høgre

Dei kosa seg på scena:)

God kommunikasjon både seg i mellom og mot publikum:)
Og sjå: Han speler veldig bra sjølv om eine handa er øydelagd!


Her er eit opptak av 3MA - høyr lyden av strengemeistrane:)